کے پی کے بالاکوٹ میں مشتعل ریچھ نے خاتون کی جان لے لی

پولیس کا کہنا ہے کہ بدقسمت واقعہ جگن کے علاقے میں پیش آیا جہاں جنگلی ریچھ نے تین بچوں کی ماں پر حملہ کردیا۔

پشاور: خیبرپختونخوا کے ضلع مانسہرہ میں جنگلی ریچھ نے تین بچوں کی ماں کو موت کے گھاٹ اتار دیا، متوفی کے لواحقین نے حکام کے خلاف احتجاجی مظاہرہ کیا۔

یہ لرزہ خیز واقعہ جمعرات کو ضلع مانسہرہ کی تحصیل بالاکوٹ کے علاقے جگن میں پیش آیا۔

پولیس نے بتایا کہ یہ افسوسناک واقعہ جگن کے علاقے میں پیش آیا جہاں ایک مشتعل جنگلی ریچھ نے حملہ کر کے تین بچوں کی ماں کو ہلاک کر دیا۔

متوفی خاتون کے لواحقین نے ڈپٹی سپرنٹنڈنٹ آف پولیس (ڈی ایس پی) کے دفتر کے سامنے احتجاجی مظاہرہ کیا اور ذمہ داروں کے خلاف کارروائی کا مطالبہ کیا۔

مظاہرین سے گفتگو کرتے ہوئے ڈی ایس پی بالاکوٹ سرکل محمد فرود نے کہا کہ ذمہ دار وائلڈ لائف اہلکاروں کی نشاندہی کے بعد ان کے خلاف قانونی کارروائی کی جائے گی۔

انہوں نے مظاہرین سے کہا کہ وہ پرسکون رہیں اور کوئی بھی قانون سے بالاتر نہیں ہے اور انہیں ہر قیمت پر انصاف فراہم کیا جائے گا۔

مظاہرین کا کہنا تھا کہ ریچھ کے حملے ان کے علاقے میں معمول بن چکے ہیں لیکن متعلقہ محکمے اس سلسلے میں ٹھوس اقدامات نہیں کر رہے۔

یہ پہلا موقع نہیں ہے کہ ریچھ نے ضلع میں شہری آبادی پر حملہ کیا ہو۔ گزشتہ سال اگست میں منگ گاؤں میں ایک خاتون جان کی بازی ہار گئی تھی اور گاؤں پامبارا میں جنگلی ریچھ کے حملے میں ایک اور خاتون زخمی ہوئی تھی۔